قرحة الفم ؟
- عبارة عن اصابة زى الموضحة فى الصورة كده بالظبط .
- ممكن تكون صغيرة أو كبيرة فى الحجم وبتكون مؤلمة جدا عن لمسها.
- بتيجى فى الفم واللثة ومشهور جدا نلاقيها فى الشفايف.
⇐ ايه أشهر الأسباب اللى ممكن تعملها ؟
( 1 ) القلق والتوتر : دول أحد أشهر الأسباب اللى ممكن تعملها والناس اللى من صفاتها التوتر الكتير والمبالغ فيه بتلاحظ ده بشكل واضح.
( 2 ) حدوث تغيرات هرمونية عند الفتيات أثناء الدورة الشهرية .
( 3 ) بعض المواد الكيميائية اللى بتكون موجودة فى معجون الأسنان زى مادة ال sodium lauryl sulfate .
( 4 ) انك تاكل أطعمة صلبة أو تعض الخد أو الشفايف أثناء الأكل أو تنظيف أسنانك بأعواد خلة صلبة أو بسبب ضرس مكسور أو أسلاك تقويم الأسنان.
( 5 ) المواد الحافظة واضافات الطعام اللى بتكون موجود فى بعض أنواع الأكل زى الشوكولاتة والقهوة .
( 6 ) نقص العناصر الغذائية زى الحديد وفيتامين ب 12 والزنك وحمض الفوليك.
( 7 ) البكتيريا الحلزونية اللى بتسبب قرحة المعدة كذلك ممكن تكون سبب فى ان يحصل لك قرحة فى الفم.
⇐هل ممكن تكون دلالة على أمراض احنا مش شايفينها ؟
- ايوه بالفعل ممكن تكون دلالة على أمراض كتيرة ومنها أمراض خطيرة
- الكلام ده خصوصا لما تكون متكررة بشكل كبير جدا وبتخف بصعوبة أو مش بتخف أصلا .
- وقتها كده يبقى لازم تكشف وتتابع مع الدكتور بشكل مستمر
- من الأمراض دى :
( 1 ) - مرض السيلياك : بينتج عن الحساسية للجلوتين ( الموجود في القمح والشعير
والشوفان ) .
( 2 ) - مرض كرون : بيكون مصحوب بتقرحات فى الجهاز الهضمى والأسهال المزمن.
( 3 ) - مرض بهجت : من أشهر أعراضه التقرحات اللى بتكون موجودة فى الفم والأعضاء التناسلية.
( 4 ) - مشكلة فى جهاز المناعة تجعله يهاجم الخلايا الصحية بدل ما يهاجم الفيروسات والبكتيريا.
تعليقات
إرسال تعليق